16 мая 2019 г. у Музеі Максіма Багдановіча адбылося тэатралізаванае мерапрыемства «І ўспомніў я час…», прымеркаванае да Міжнароднага дня музеяў.
У гэты травеньскі дзень наведвальнікі музея больш за паўтары гадзіны разам з супрацоўнікамі і арганізатарамі вандравалі па незвычайным маршруце «Тэатр, музыка і паэзія».
Першая частка мерапрыемства пачалася з успамінаў пра далёкія 1892-1896 гг., калі ў г.Гродна пражывала сям’я Багдановічаў. Менавіта тут, на крутых берагах Нёмана, гуляючы разам з бацькамі, будучы паэт Максім Багдановіч пяцігадовым хлопчыкам убачыў усё хараство беларускай прыроды, бяздонны блакіт роднага неба і кветку радзімы - васілёк.
Супрацоўнік музея ад імя Марыі Апанасаўны Багдановіч (маці паэта) пазнаёміў наведвальнікаў з інтэр’ерам кватэры сям’і Багдановічаў, распавёў пра цікавыя падрабязнасці аб адносінах у сям’і і жыцці ў Гродне, пра асаблівасці выхавання дзяцей, пра працоўную і творчую дзейнасць Адама Багдановіча (бацькі паэта). Гаспадыня кватэры пачаставала ўсіх гасцей зёлкавай гарбатай з мяты і шалфея.
Другая, паэтычна-музычная, частка мерапрыемства прайшла пад дэвізам «Калі мы памятаем – мы жывём!»
У кожнага з нас ёсць свае ўспаміны або думкі аб падзеях мінулага, але толькі яны – творчыя і таленавітыя асобы – здольны ператварыць гэтыя ўспаміны ў вершаваныя радкі!
У мерапрыемстве прынялі ўдзел прадстаўнікі Гродзенскага абласнога аддзялення Саюза пісьменнікаў Беларусі: паэтэса, празаік, перакладчык, старшыня Гродзенскага абласнога аддзялення Саюза пісьменнікаў Беларусі Людміла Антонаўна Кебіч, паэт, ганаровы член Саюза пісьменнікаў Браніслаў Іосіфавіч Ермашкевіч.
Сваімі вершамі і ўспамінамі парадавалі гасцей прадстаўнікі гродзенскага літаратурнага аб’яднання «Надзея»: паэтэса і кіраўнік аб’яднання Святлана Валянцінаўна Глямбоцкая, паэтэса, празаік, выдатнік асветы СССР Наталля Васільеўна Чакліна-Гарбачова, паэтэса, перакладчыца Алена Георгіеўна Чэпукене, паэтэса, настаўнік беларускай мовы і літаратуры Людміла Мілоста, паэтэса Наталля Васільеўна Озерава.
Музыка, як і вершы, гэта тое, што дапамагае нам аднавіць у памяці самыя пяшчотныя і яскравыя моманты жыцця. Узнёслы настрой усім гасцям падаравалі Руслан Бекяшоў (вакал) і Павел Кавальчук (гітара), у выкананні якіх прагучала музычная кампазіцыя «Запяі мне песню…».
Душы гасцей мерапрыемства «І ўспомніў я час!» былі сагрэты яскравым выступленнем маладога і таленавітага музыканта Гродзенскага дзяржаўнага музычнага каледжа – Кацярыны Беленя (гітара). Выкладчык – Уладзімір Іванавіч Захараў.
Цёплыя і шчырыя словы падзякі арганізатарам мерапрыемства прагучалі ад ганаровых гасцей, прадстаўнікоў Гродзенскай абласной арганізацыі Беларускага грамадскага аб’яднання ветэранаў: Тамары Мікалаеўны Істомінай (намесніка старшыні арганізацыі), Марыі Аляксандраўны Станіславіч (старшыні камісіі па культурна-масавай рабоце і сувязям са СМІ ), Марыі Афанасьеўны Бодак (адказнага сакратара арганізацыі).
Шчыры дзякуй усім удзелькам і гасцям мерапрыемства!
Фота Сцяпана Кічука і Марыі Станіславіч.