У 2024 годзе Беларусь адзначае 80-ю гадавіну вызвалення ад нямецка-фашысцкіх захопнікаў. З гэтай нагоды 12 чэрвеня супрацоўнікі нашага музея правялі мерапрыемства «Не гасне памяць: кнігі пра вайну».
Літаратура супрацьстаіць забыццю: адыгрывае неацэнную ролю ў захаванні памяці пра вайну, выконваючы шэраг важных функцый. Кнігі, дзённікі, лісты з фронту – крыніца каштоўных звестак пра ваенныя падзеі. Літаратура дае магчымасць не проста іх зафіксаваць, але і асэнсаваць, убачыць вайну вачыма розных людзей, зразумець яе прычыны, уплыў на лёсы і ўвесь свет. Творы пра вайну, раскрываючы жорсткасць, бессэнсоўнасць і разбуральнасць вайны, служаць папярэджаннем для будучых пакаленняў.
У мерапрыемстве прынялі ўдзел прадстаўнікі нашага маладога пакалення – вучні ДУА «Гімназія №10 імя мітрапаліта Філарэта (Вахрамеева) г. Гродна» і ДУА «Сярэдняя школа № 41 імя А. М. Кузняцова г. Гродна». Падчас мерапрыемства яны не толькі змаглі ў форме віктарыны ўзнавіць свае веды пра Другую Сусветную і Вялікую Айчынную войны, але і пазнаёміліся з творамі гродзенскіх аўтараў, звярнуліся да творчасці Міхася Васілька, Аляксея Карпюка, Анатоля Вярцінскага, Васіля Быкава, даведаліся пра жыццё пісьменнікаў, якія прайшлі праз вайну, чыё дзяцінства, маладосць былі апалены вайной: агнём, пакутамі, ахвярамі.
Вучні паспяхова выканалі заданні розных катэгорый: чыталі вершы, складвалі іх па радках, устаўлялі прапушчаныя словы, знаёміліся і ўзнаўлялі сюжэты празаічных твораў, слухалі песні і дзяліліся ўражаннямі ад іх, знаёміліся з кадрамі беларускіх фільмаў, знятых па матывах твораў пра вайну.
Безумоўна, літаратура не здольная ў поўнай меры перадаць увесь жах і трагедыю вайны, але яна застаецца адным з найважнейшых інструментаў захавання памяці пра вайну, дазваляючы нам лепш зразумець мінулае і зрабіць усё магчымае, каб прадухіліць новыя войны.