Адам (Адольф) Ягоравіч Багдановіч (20 сакавіка (1 красавіка) 1862, мяст. Халопенічы Барысаўскага павету Мінскай губерні, цяпер Крупскі раён Мінскай вобласці – 16 красавіка 1940, г. Яраслаўль) – беларускі этнограф, фалькларыст, мемуарыст, гісторык, мовазнавец, бацька вядомага паэта Максіма Багдановіча.
У аўтабіяграфіі А.Я.Багдановіч адзначаў, што дата яго нараджэння ў афіцыйных дакументах зафіксавана няправільна. Насамрэч ён нарадзіўся не 20, а 25 сакавіка 1862 г. Пры хрышчэнні атрымаў імя Адольф, якое пазней было заменена на Адам.
А.Я.Багдановіч скончыў Халопеніцкае народнае вучылішча (1874), Нясвіжскую настаўніцкую семінарыю (1882). Быў прызначаны на пасаду настаўніка школы в.Пагарэлае Ігуменскага павету, у 1886-1892 гг. працаваў настаўнікам, затым загадчыкам 1-га Мінскага прыходскага вучылішча, выкладаў таксама ў Мінскім яўрэйскім рамесніцкім вучылішчы.
З прычыны хваробы на сухоты Адам Багдановіч пакінуў педагагічную працу і быў пераведзены на пасаду памочніка бухгалтара Гродзенскага аддзялення Сялянскага пазямельнага банка. З 1892 г. да 1896 г. ён разам са сваёй сям’ёй (жонкай Марыяй Апанасаўнай, сынамі Вадзімам, Максімам і Лёвам) жылі ў Гродне.
Паводле ўспамінаў Адама Ягоравіча, “в Гродно я сразу запрягся в три дела: служба по отделению Крестьянского банка, где я вёл всё делопроизводство... сотрудничал в неофициальной части “Губернских ведомостей” и был избран директором публичной библиотеки, сверх того, я состоял представителем общества драматических писателей и оперных композиторов. Круг знакомства был более тесный (врачи, некоторые педагоги, некоторые офицеры...), да и город-то сам был вдвое меньше Минска...” [Шлях паэта, Мн., 1975. – с. 20].
Бясспрэчна, у 4-х пакаёвай кватэры, якую здымалі Багдановічы на 1-м паверсе ў доме Агульнікава, што знаходзілася ў Новым свеце, у Адама Ягоравіча быў працоўны кабінет. Як, прыкладна, выглядаў на той час кабінет дзяржаўнага служачага канца ХІХ ст. можна ўбачыць у нашым музеі.
Вашай увазе створаны іншыя мемарыяльныя пакоі – жаночы і дзіцячы, гасцёўня, а таксама літаратурныя залы, у якіх можна пазнаёміцца з гродзенскім перыядам жыцця Багдановічаў, і, канечне, лёсам і творчасцю Максіма Багдановіча. Каб даведацца пра гэта і тое, чаму Багдановічы пакідаюць наш горад, запрашаем наведаць Музей Максіма Багдановіча!
Мы працуем 10.00 да 18.00 (панядзелак - выхадны). Тэл. 71 95 86