У ХІХ ст. паспарту з’яўлялася неад’емнай часткай фотаздымка. Паспарту надавала фотаздымку не толькі шыкоўны выгляд, але і было візітнай карткай і своеасаблівай рэкламай фатографу. Унізе на пастарту звычайна змяшчалі назву горада і фотаатэлье альбо прозвішча фатографа. Напрыклад, «Sadovski&Kozlovski. Grodno», «M.Rubinstein. Grodnо», «З.Я.Карасикъ. Гродно», «Л.М.Гельгоръ. Гродно».
На адваротным баку паспарту быў змешчаны адрас фотаатэлье. Так, атэлье Л.Гельгора знаходзілася на Саборнай плошчы (сучасная Савецкая плошча) ў доме Курляндскага (далучаўся да дома купца Мураўёва), а З.Карасік трымаў атэлье на Саборнай вуліцы (сучаснай вул.Савецкай) у доме Баркоўскага, што стаяў на месцы новай часткі сучаснага гандлёвага дома «Нёман». На адваротным баку фотаздымка маглі быць пазначаны спецыяльныя паслугі, якія здзейнічалі ў фотаатэлье: «увеличение портретов до натуральной величины» або «изготовление заколокъ, жетоновъ, брелоковъ, булавокъ съ изображениемъ желаемого лица», а таксама ўзнагароды і дыпломы фотамайстра: «Удостоинъ Высочайшей Его Императорскаго Высочества благодарности въ 1804 и 1808 г.г.». Л.Гельгор паведамляў, што з’яўляецца «дистанционнымъ членомъ Русскаго фотографическ. о-ва в Москве».
Сям’я Багдановічаў у Гродне пражывала з 1892 па 1896 гг. Як і іх сучаснікі, Багдановічы таксама любілі фатаграфавацца. У фондах нашага музея захоўваюцца арыгінальныя фотаздымкі членаў сям’і, іх родных і знаёмых. У 1892 г. у фотамайстэрні І.І. Садоўскага – Л.М. Казлоўскага быў зроблены першы фотаздымак будучага пісьменніка Максіма Багдановіча (1891–1917) разам з мамай Марыяй Апанасаўнай Багдановіч (1869–1896) і фотаздымак яго бацькі Адама Ягоравіча Багдановіча (1862–1940).
