Сусветны дзень фатаграфіі – гэта свята ўсіх, хто любіць фатаграфаваць і фатаграфавацца. І фатографы-аматары, і прафесіяналы штогод адзначаюць гэты дзень.
У нашым музеі захоўваецца шмат арыгінальных фотаздымкаў канца ХІХ – пачатку ХХ стагоддзя. Рэдкай з’явай у галіне фотасправы таго часу былі жанчыны-фатографы. Адной з іх была К. Трускоўская, якая працавала ў Гродне на пачатку ХХ ст. Ёсць версія, што яе майстэрня размяшчалася ў доме Трускоўскіх на сучаснай вуліцы Сацыялістычнай.
Вядомы два фотаздымкі, зробленыя гэтай жанчынай-фотамайстрам, адзін з іх знаходзіцца ў экспазіцыі нашага музея. На фотаздымку, зробленым у фотаатэлье, прыгожая жанчына ў светлай доўгай сукенцы на фоне высокага дрэва і мора. На яе галаве саламяны капялюш са стужкай, у правай руцэ – раскрыты парасон.
Сусветны дзень фатаграфіі – падзея яркая і пазітыўная. Гэта добрая нагода зрабіць фотаздымак на памяць: зафіксаваць цікавы момант, прыгожае месца, важную падзею свайго жыцця.