«На чыстым аркушы, прад вузенькім акном,
Прыгожа літары выводзіць ён пяром…»
М.Багдановіч «Перапісчык»
З 18 студзеня 2022 года працуе выстаўка «Прыгожа літары выводзіць ён пяром», прымеркаваная да Дня почырку, або Дня ручнога пісьма.
Штогод 23 студзеня адзначаецца гэтае свята, мэтай якога з’яўляецца неабходнасць нагадаць чалавецтву пра важнасць каліграфічнага почырку і ўнікальнасць ручнога пісьма, пра неабходнасць практыкавацца ў ім і непаўторнасць почырку кожнага чалавека.
У свеце сучасных высокіх тэхналогій рукапісны тэкст не губляе сваёй значнасці нягледзячы на тое, што людзі менш пачалі пісаць ад рукі, аддаючы перавагу набору тэкстаў на камп’ютарах і мабільных тэлефонах.
Значную частку музейнага фонду складаюць рукапісы твораў вядомых беларускіх пісьменнікаў. На выстаўцы экспануюцца аўтографы твораў: У.Караткевіч «Багдановічу» (1981), Я.Брыль «Роздум пра Максіма Багдановіча» (1986), Л.Ялоўчык «М.А.Багдановічу» (1981), З.Верас «З маіх успамінаў» (1980-я), прысвечаныя класіку беларускай літаратуры Максіму Багдановічу. Унікальным экспанатам з’яўляецца рукапісны сшытак з вершамі Д.Бічэль-Загнетавай - паэтэсы, стваральніцы Музея Максіма Багдановіча.
Увазе наведвальнікаў прадстаўлены кнігі з аўтографамі аўтараў: Д.Бічэль «Дзявочае сэрца» (1961), А.Цяжкага «Сустрэча пасля вясны» (1980) і «Пара блакітных дажджоў» (1982), В.Супруна «За смугою часу» (1994), Л.Ялоўчык «Па хісткай лесвіцы» (1988), Н.Мацяш «Поўны келіх» (1982). Экспануюцца фотаздымкі беларускіх пісьменнікаў, пісьмовыя прыборы і ручкі А.Цяжкага, В.Супруна, Л.Ялоўчык, паштоўка В.Супруна да Д.Бічэль.
Выстаўка працуе штодзённа з 10.00 да 18.00, акрамя панядзелка.
Кошт уваходнага квітка – 10 кап.
Запрашаем!