16 сакавіка адзначаецца Дзень каляровых алоўкаў. Сёння цяжка ўявіць дзяцінства без такіх простых на першы погляд прадметаў, але былі часы, калі імі не карысталіся. Гісторыя графітных алоўкаў пачынаецца з XVI ст. Што тычыцца каляровых, іх з’яўленне ў драўляным корпусе прыпадае на 1820 год. У той жа час гісторыя выкарыстання каляровых алоўкаў сягае яшчэ далей, а першаадкрывальнікі наогул невядомыя. Як мастацкі матэрыял каляровыя алоўкі шырока пачалі выкарыстоўвацца толькі ў пачатку ХХ ст.
Цікава, што першапачаткова алоўкі былі толькі круглымі, аднак увесь час падалі са стала, таму ім сталі надаваць шасцігранную форму. Цікава і тое, што для вырабу алоўкаў часцей за ўсё выкарыстоўваецца ліпа ці алешына.
У фондах нашага музея захоўваецца малюнак Цэбенко Аляксандра. Былым навучэнцам Карэліцкай школы мастацтваў каляровымі алоўкамі выканы партрэт Максіма Багдановіча. Яшчэ адзін мастак Будавей Дзмітрый, натхніўшыся творчасцю паэта, стварыў малюнак “Венера”.
