З 20 лютага 2016 г. па 16 траўня 2016 г. у Музеі Максіма Багдановіча дзейнічае выстаўка «Сонца ранак падарыла».
На выстаўцы экспануюцца выданні для дзяцей на беларускай мове, дзіцячыя дэкаратыўныя вырабы.
Беларуская дзіцячая літаратура бярэ свой пачатак з даўніх часоў ад дзіцячага фальклору (казкі, калыханкі, загадкі, дзіцячыя песні, гульні і г. д.). Станаўленне дзіцячай літаратуры, як жанру, адносіцца да XVI ст., часу ўзнікнення беларускага кнігадрукавання, і звязана з дзейнасцю Ф. Скарыны, С. Буднага, Л. і С. Зізаніяў, С. Полацкага і інш. У ХІХ ст. творы для дзяцей пісалі Ф. Багушэвіч, А. Гурыновіч, Я. Лучына. Яны заклалі асновы гуманістычнай дзіцячай літаратуры, звязанай з традыцыямі фальклору.
Пачатак XX ст. адзначыўся беларускім культурна-нацыянальным адраджэннем, пачалі адкрывацца школы, быў легалізаваны беларускі друк. Выходзіць першая кніга для навучання дзяцей на роднай мове «Беларускі лемантар» (1906). Значную ролю ў выхаванні юнага пакалення любові да роднага слова адыгралі «Першае чытанне для дзетак беларусаў» Цёткі, «Другое чытанне для дзетак беларусаў» Я. Коласа.
У скарбніцу дзіцячай літаратуры ўвайшлі вершаваная казка Я. Коласа «Рак-вусач» з багатым ідэйным зместам, а таксама верш Я. Купалы «Алеся», прысвечаны моладзі. У казцы «Мушка-зелянушка і Камарык – насаты тварык» М.Багдановіч, звярнуўшыся да фальклорных матываў, далучыў дзяцей да асноў маралі.
Паэзія для дзяцей вылучаецца дасціпным гумарам, адчуваннем спецыфікі ўзросту ў кнігах «Ластаўка» Л. Геніюш, «Калі спрачаюцца маланкі» У. Мазго.
Жанравай разнастайнасцю вылучаецца паэзія Р. Барадуліна, які віртуозна карыстаўся гукапісам, гуляў словам, ды каламбурыў («Індыкала-кудыкала» і інш.).
Вершы гродзенскага паэта В. Кудлачова выхоўваюць у дзяцей пачуццё любові да людзей, да добрых спраў, да прыроды («Сонца ранак падарыла», «Намалюю горад Гродна»).
Дзіцячая літаратура далучае юных чытачоў да агульначалавечых каштоўнасцей, паглыбляе сувязі з нацыянальнымі каранямі, раскрывае спецыфіку маральна-этычных праблем і адносінаў у грамадстве.
Запрашаем на выстаўку!
