Напярэдадні 132-й гадавіны з дня нараджэння Максіма Багдановіча ў музеі прайшло мерапрыемства “Старанна літары малыя вываджу…”, прымеркаванае да гэтай святочнай даты. Яго ўдзельнікамі сталі вучні 4 класа сярэдняй школы № 32 імя Т. Р. Ларыёнавай г. Гродна.
Падчас мерапрыемства дзеці даведаліся пра жыццёвы і творчы шлях паэта і перанесліся ў атмасферу гімназіі пачатку ХХ стагоддзя. У такой навучальнай установе (спачатку Ніжагародскай, а пасля Яраслаўскай) вучыўся будучы класік беларускай літаратуры. Званок абвясціў пачатак урока, і перад вучнямі з’явіліся навуковыя супрацоўнікі музея ў вобразе настаўніц гімназіі. Першым быў урок гісторыі, далей нашых гасцей чакалі ўрокі мовы, прыродазнаўства, музыкі, геаграфіі, матэматыкі і чыстапісання.
Падчас ўрока гісторыі вучні даведаліся пра пісьмовыя прылады, якімі карысталіся больш за 100 гадоў таму. Гэта пёравыя ручкі, чарніліцы, прэс-папье... На ўроку мовы “гімназісты” даведаліся пра тыя мовы, якія ведаў і вывучаў Максім Багдановіч. Паспрабавілі рабіць пераклады, адгадвалі фразеалазізмы, прыказкі і прымаўкі.
У творчасці паэта неаднаразова ўзгадваюцца расліны і жывёлы. Урок прыродазнаўства дазволіў вучням даведацца пра назвы дрэў, кветак, птушак і звяроў, якія сустракаюцца ў радках вершаў Максіма Багдановіча.
Не абмінулі ўвагай і гарады, што звязаны з жыццём і творчасцю паэта. Мінск, Гродна, Ніжні Ноўгарад, Яраслаўль. З імі пазнаёміў вучняў урок геаграфіі.
На ўроку музыкі гучалі кампазіцыі на словы Максіма Багдановіча ў выкананні розных спевакоў.
Напрыканцы мерапрыемства падчас урока чыстапісання ў гасцей музея была магчымасць самастойна паспрабаваць пісаць сапраўднымі пёравымі ручкамі. Кожны са школьнікаў падпісаў сабе паштоўку на памяць.