Выхаванцы ДУА «Спецыяльны дзіцячы сад № 21 г. Гродна для дзяцей з цяжкімі парушэннямі маўлення» на працягу васьмі апошніх гадоў з’яўляюцца самымі актыўнымі наведвальнікамі Музея Максіма Багдановіча.
Сёння, у Сусветны дзень здароўя, дзеці старшай групы разам з выхавацелем Захарчук Таццянай Валянцінаўнай і загадчыкам дзіцячага сада Крыніцкай Ліліяй Дзмітрыеўнай прынялі ўдзел у тэматычным занятку «Максімаў домік». Хлопчыкі і дзяўчынкі ўважліва слухалі экскурсавода і актыўна адказвалі на пытанні.
На прыкладзе макета, дзеці даведаліся пра тое, як выглядаў домік, дзе жыў разам са сваімі роднымі маленькі хлопчык Максім, які пазней стаў вядомым беларускім паэтам.
Вандруючы па мемарыяльнай кватэры, дзеці ўбачылі, якія прадметы мэблі і інтэр’еру маглі быць у гасцёўні, дзіцячым і жаночым пакоях і працоўным кабінеце. Маленькія наведвальнікі даведаліся пра тое, што памяшканні ацяплялі раней пры дапамозе печаў, вада награвалася і закіпала ў самавары, які працаваў на вуглях, людзі пісалі пяром, якое макалі ў чарніла, пакоі асвятляліся газавымі лямпамі або свечкамі, і нават цацкі ў дзяцей раней былі іншымі.
З вялікім задавальненнем напрыканцы занятка ўсе разам пагулялі з глінянымі свісцёлкамі, драўлянымі і саламянымі цацкамі.
Моцнага ўсім здароўя і да новых сустрэч у Доме-музеі славутага беларускага паэта Максіма Багдановіча!
