Ўжо пара мне дадому збірацца, –
Вечар позны, а час не стаіць.
Ах, калі б ты магла здагадацца,
Як не хочацца мне ухадзіць...
Максім Багдановіч
Супрацоўнікі нашага музея амаль штодзённа чуюць ад уражаных наведвальнікаў: «Якая тут цудоўная і непаўторная атмасфера! Якія тут прыгожыя старадаўнія інтэр’еры! Як нам хочацца яшчэ хоць трошкі затрымацца!» Сапраўды, мемарыяльныя пакоі Музея Максіма Багдановіча зачароўваюць наведвальнікаў сваёй прыгажосцю, утульнасцю і цішынёй, нават пераступіўшы толькі парог дома, адразу здаецца, што мы ў ХІХ ст. у гасцях у Багдановічаў, а гаспадары зусім ненадоўга выйшлі прагуляцца ў гарадскі парк. Увагу прыцягвае кожная дэталь: адмысловая разьба па дрэве на буфеце ў гасцёўні, металічны ложак з роспісам у жаночым пакоі, алавяныя салдацікі ў дзіцячым пакоі, літыя чарніліцы незвычайнай формы ў працоўным кабінеце і шмат іншага.
Прапануем звярнуць вашу ўвагу яшчэ на некаторыя экспанаты, каб адчуць сапраўды «таямнічую» атмасферу Дома-музея Максіма Багдановіча і ў бліжэйшы час адразу ж накіравацца да нас у госці.
1. Тульскі самавар на самаварным століку ў гасцёўні выклікае захапленне ў кожнага наведвальніка, але не ўсе ведаюць пра клеймы, змешчаныя на яго накрыўцы. І толькі самыя ўважлівыя змогуць прачытаць: «Тула / Торговый домъ Бр. Шемариныхъ».
2. Без прыгажуні з белай кафлі з вытанчаным рэльефным карнізам цяжка ўявіць сабе гасцёўню музея. Канешне, гэта печ. Калі вам пашчасціць наведаць нас у сонечны дзець, прыглядзіцеся, калі ласка: белы колер кафлі быццам пераліваецца рознымі адценнямі – ружаватым, шэрым і нават бэзавым.
3. «О! Піяніна!» – скажа амаль кожны, убачыўшы наш музычны інструмент – фісгармонію. Вам абавязкова раскажуць пра гэты інструмент, чым ён адрозніваецца ад піяніна, раяля або клавесіна, раскрыюць сакрэты, якія трэба ведаць, каб на ім іграць.
4. Там жа, у жаночым пакоі, захапляе эрганамічным дызайнам не толькі трумо, але і флаконы з-пад парфумы, пацеркі, пудэлка для біжутэрыі, зашпілька для валасоў.
5. Сюрпрызы чакаюць і ў працоўным кабінеце. Вы даведаецеся, што цудоўны насценны гадзіннік канца ХІХ ст. заводзіцца ключом, які ўстаўляецца ў адтуліну на цыферблаце.
6. Рэкардсмен па колькасці захапленняў ад убачанага – гэта дзіцячы пакой. Мала хто з вас не адчуе неадольнага жадання прысесці на падлогу і ўбачыць любімыя цацкі. Мара кожнага хлопчыка – алавяныя салдацікі. Паспрабуйце сярод іх знайсці караля Рычарда Ільвінае Сэрца! А ці зможаце адрозніць рымскага легіянера ад грэчаскага гопліта, а ваяра-вікінга ад гальскага правадыра?
Шчыра запрашаем у наш музей, дзе вас чакае мноства сакрэтаў і загадак, якія адразу захочацца знайсці і разгадаць! Тэлефануйце: 8 0152 71 95 86, прыходзьце: вул. 1 Мая, 10 (з 10.00 да 18.00, панядзелак – выхадны).