Навіны

Юбілеі адзначаюць не толькі паэты і пісьменнікі, але і іх творы!

125 гадоў таму, у 1895 г., у Гродзенскай губернскай тыпагрыфіі выйшаў этнаграфічны нарыс Адама Ягоравіча Багдановіча «Пережитки древняго міросозерцанія у белорусовъ». Выданне прысвечана фальклорнай спадчыне беларусаў (звычаям, традыцыям і павер’ям), назіраннем, запісам і даследаваннем якой займаўся сам аўтар.

Матэрыялы для кнігі былі сабраны ў Барысаўскім, Ігуменскім, Мінскім, Слуцкім і Навагрудскім уездах Мінскай губерніі, Сенненскім і Аршанскім уездах Магілёўскай губерніі і Лепельскім уездзе Віцебскай губерніі.  

Аўтар апісвае ўмовы жыцця беларускіх сялян, асуджае прыгонніцтва. Чытачы маюць магчымасць пазнаёміцца са шматлікімі загаворамі (ад укуса змяі, ад вывіхаў і пераломаў, ад урокаў, перад ад’ездам у далёкі шлях), пахавальнымі абрадамі, каляднымі звычаямі, гульнямі і варажбойі, асаблівасцямі святкавання Вялікадня, міфічнымі істотамі (Хатнікам, Лазьнікам, Хлеўнікам, Вадзяніком, Лясуном і інш.).

Матэрыялы, прадстаўленыя ў працы, сведчаць аб багацці і разнастайнасці духоўнага свету беларускага народа. Міфалагічныя вобразы з гэтага даследавання плённа выкарыстоўваў у сваёй паэтычнай творчасці сын Адама Ягоравіча паэт Максім Багдановіч.

Адам Ягоравіч Багдановіч (1862–1940) – беларускі этнограф, фалькларыст, педагог, мовазнавец, мемуарыст. Нарадзіўся ў м. Халопенічы Мінскай губерніі. У 1874 г. скончыў Халопеніцкае народнае вучылішча, у 1882 г. – Нясвіжскую настаўніцкую семінарыю. У 1886–1892 – настаўнік, загадчык 1-га Мінскага прыходскага вучылішча. Па рэкамендацыі дактароў пакінуў выкладчыцкую дзейнасць. З 1892 па 1896 гады займаў пасаду памочніка бухгалтара Гродзенскага аддзялення Сялянскага пазямельнага банка, з 1896 па 1902 гг. – бухгалтара Ніжагародскага аддзялення, з 1918 па 1820 гг. – аканом Яраслаўскага аддзялення. У 1920 г. быў прыняты на працу ў Яраслаўскі гістарычны музей на пасаду загадчыка навуковай бібліятэкі. У 1931 г. выйшаў на пенсію. Займаўся навуковай і літаратурнай працай. Большая частка яго даследаванняў прысвечана этнаграфіі і гісторыі культуры. Фальклорныя запісы А.Багдановіча апублікаваны ў рабоце П.Шэйна «Материалы для изучения быта и языка населения Северо-Западного края».