14 лістапада споўнілся 115 гадоў з дня нараджэння паэта Міхася Васілька (Міхаіла Восіпавіча Касцевіча). Гэтае імя цесна звязана з нашым горадам. Ёсць у Гродне і вуліца, названая іменем гэтага паэта.
Нарадзіўся ён у 1905 г. у в. Баброўня ў сям’і лесніка. Потым атрымаў адукацыю ў Мічурынску, дзе сям’я была ў бежанстве. Пасля вяртання на Радзіму арганізоўваў гурткі Таварыства беларускай школы і за свой актыўны ўдзел у рэвалюцыйным руху быў неаднаразова арыштаваны. Паэзія Васілька была папулярнай сярод простых людзей, вершы распаўсюджваліся ў рукапісным выглядзе. Непадалёк ад цэнтра мястэчка Скідзель, кожны аўторак праводзіліся кірмашы. Тут можна было не толькі штосьці прадаць ці купіць, але павесяліцца: паслухаць вершы і песні, сцэнкі са спектакляў, паўдзельнічаць у розыгрышы латарэй. Цікавасць гледачы выказвалі да многіх артыстаў. Але найбольш даспадобы былі выступленні Міхася Васілька, які чытаў свае вершы, поўныя гумару і смеху, падмацоўваючы іх крытычнымі малюнкамі, якія дэманстраваў яго сябра-аднавясковец Рыгор Каскевіч. Местачковыя ведалі Міхася Васілька як «дзівака з Баброўні».
У друку пачаў выступаць у 1926 г. у віленскіх выданнях. Першы зборнік лірыкі «Шум баравы» (1929) быў канфіскаваны паліцыяй. Рукапіс другога зборніка быў забраны дэфензівай і знішчаны (1934). У 1937 г. у Вільні выйшаў зборнік «З сялянскіх ніў». У 1939 г. Міхась Васілёк быў мабілізаваны ў польскае войска і ў хуткім часе трапіў у палон, але здолеў збегчы. Вярнуўшыся на Радзіму, актыўна ўдзельнічаў у падпольным друку пад псеўнадімам Язэп Гром. Пасля вызвалення Беларусі працаваў у газеце «Гродзенская праўда», быў членам Саюза пісьменнікаў. Друкаваўся ў газетах «Народная справа», «Наш голас», «Народны звон», «Наша воля», «Беларускі дзень», «Наша праўда», «Беларуская газета», часопісах «Маланка», «Калосьсе», «Нёман», «Снапок».
Памёр у Гродне 3 верасня 1960 г., пахаваны на праваслаўных гродзенскіх могілках. Вуліца, поруч з якой жыў паэт, носіць яго імя, на доме, што пабудаваны на месцы апошняга прытулку паэта, у 1986 г. устаноўлена мемарыяльная дошка.
У Музеі Максіма Багдановіча ў экспазіцыі «Гродзеншчына літаратурная» прадстаўлены асабістыя рэчы паэта: гадзіннік, акуляры, блакнот, паліто, шалік, партфель. На фотаздымках у экспазіцыі наведвальнікі могуць убачыць Міхася Васілька разам са сваякамі і аднавяскоўцамі ў в.Баброўня, са знаёмымі на Савецкай плошчы ў г.Гродна. Прадстаўлены таксама зборнікі паэта «Шум баравы» (Вільня, 1929 г.) і «З сялянскіх ніў» (Вільня, 1937 г.), кніга «Вершы» (Мінск, 1973 г.) з дароўным надпісам ад жонкі і сына М.Васілька. У экспазіцыі знаходзіцца таксама партрэт паэта, напісаны мастаком Д.Парахнёй (Гродна, 1955 г.).