2 чэрвеня 2018 года ў межах ХІІ Рэспубліканскага фестывалю нацыянальных культур у Музеі Максіма Багдановіча адбылася міжнародная літаратурная імпрэза «Максім Багдановіч і ўвесь свет». Гасцямі мерапрыемства сталі замежныя і беларускія паэты, пісьменнікі, перакладчыкі, мастакі – Марат Гаджыеў і Саід Ніналалаў з Дагестана, Глеб Кудрашоў з Украіны, Катажына Канчэўская з Польшчы, Марыя Кобец з Берасцейшчыны і іншыя.
Святлана Воцінава, галоўны рэдактар часопіса «Маладосць», і Мікалай Трус, намеснік галоўнага рэдактара часопіса «Полымя» пазнаёмілі ўдзельнікаў з праектамі «Чытаем Багдановіча разам!» і «Падарунак Максіму», мэтай якіх стаў пераклад верша Максіма Багдановіча на розныя мовы народаў свету. Гэтыя культурныя акцыі былі прымеркаваны да 125-годдзя з дня нараджэння М.Багдановіча. Падчас праектаў верлібр Максіма Багдановіча «Я хацеў бы спаткацца з Вамі…» быў перакладзены на 14 моў свету.
Госці змаглі ўбачыць і пачуць у відэазапісах, як носьбіты моў чытаюць верш на англійскай, кітайскай, японскай, украінскай, іспанскай, літоўскай, татарскай і славацкай мовах, а прысутныя К.Канчэўская і М.Кобец прачыталі свае пераклады гэтага верша на польскую і сербскую мовы.
На заканчэнне імпрэзы ўсе госці разам прачыталі верш «Я хацеў бы спаткацца з Вамі…» па-беларуску.
