11 сакавіка на 91 годзе жыцця не стала пісьменніка, літаратуразнаўцы, краязнаўцы Аляксея Пяткевіча.
Аляксей Міхайлавіч - кандыдат філалагічных навук, прафесар, дацэнт кафедры беларускай культуры Гродзенскага дзяржаўнага ўніверсітэта імя Янкі Купалы, ганаровы член Міжнароднай асацыяцыі беларусістаў, сябра Саюза беларускіх пісьменнікаў, сябра Міжнароднага Купалаўскага Фонду.
Ураджэнец вёскі Новы Свержань (зараз Стаўбцоўскі раён Мінскай вобласці), выпускнік філалагічнага факультэта Беларускага дзяржаўнага ўніверсітэта, 65 гадоў свайго жыцця Аляксей Пяткевіч пражыў у Гродне, працаваў у Гродзенскім дзяржаўным універсітэце імя Янкі Купалы.
За час сваёй навуковай дзейнасці Аляксей Пяткевіч выдаў больш за 500 літаратурна-крытычных і культуралагічных работ, у тым ліку 16 кніг. Сярод якіх – «Літаратурная Гродзеншчына», «Людзі культуры Гродзеншчыны», «Старонкі спадчыны», «Слова і кніга Прынёмання», «Аўтографы – разам» і іншыя. Штогод, пачынаючы з 2010, рыхтаваў і выпускаў «Беларускі настольны перакідны краязнаўчы каляндар (на матэрыяле Гродзеншчыны)», змест якога складаюць круглыя даты прыкметных асоб і падзей рэгіёна.
Кніжныя рарытэты з бібліятэкі прафесара знаходзяцца ў калекцыях музея А.Пашкевіч (Цёткі) у Астрынскай сярэдняй школе (Шчучынскі раён), а таксама Гудзевіцкага дзяржаўнага літаратурна-этнаграфічнага музея (Мастоўскі раён). У 2016 годзе Аляксей Міхайлавіч перадаў Музею Максіма Багдановіча зборнік твораў М.Багдановіча «Вянок паэтычнай спадчыны» (Нью-Йорк – Мюнхэн, 1960) і 1-ы том кнігі М.Багдановіча «Творы» (Мінск, 1927).
