У Музеі Максіма Багдановіча з 1 лістапада працуе выстаўка «Засушыў я на паперы краскі, свежыя калісьці...», прымеркаваная да Дня нараджэння Максіма Багдановіча.
Максім Багдановіч (09.12.1891–25.05.1917) – самы малады класік беларускай літаратуры, паэт-наватар, празаік, перакладчык, крытык, гісторык і тэарэтык літаратуры, публіцыст.
На выстаўцы экспануецца кніга твораў Максіма Багдановіча “Зорка Венера” (уклад. А. Клышка, 1991), кнігі, прысвечаныя даследаванню жыцця і творчасці паэта: Л. Зубараў “Максім Багдановіч” (1989), “Я хацеў бы спаткацца з вамі...” (уклад. Т. Шэляговіч, 2009).
Максім Багдановіч лічыцца пачынальнікам традыцыі беларускага мастацкага перакладу. Ім зроблены пераклады на рускую мову твораў Я. Купалы, Т. Шаўчэнкі, І. Франко, на беларускую мову – Авідзія, Гарацыя, Г. Гейнэ, Ф. Шылера, Э. Верхарна, А. Пушкіна.
З французскай мовы на беларускую М. Багдановіч пераклаў 22 вершы паэта-імпрэсіяніста Поля Верлена. На выстаўцы экспануецца кніга твораў Поля Верлена “У месяцовым ззянні” (уклад. А. Лойка, 1974), копія аўтографа перакладу М. Багдановіча з верша П. Верлена “Плач сэрца майго”.
Увазе наведвальнікаў прадстаўлены кнігі з творамі Максіма Багдановіча ў перакладзе на рускую, балгарскую, нямецкую, літоўскую, англійскую і іншыя мовы.
Цікавасць уяўляюць запрашэнні на адкрыццё рэспубліканскай выстаўкі выяўленчага мастацтва і на ўрачысты вечар, прысвечаныя 90-годдзю з дня нараджэння М. Багдановіча (1981), кніга Л. Абеліёвіча “Рамансы паводле тэкстаў М. Багдановіча” (1982) і грампласцінка “Да 90-годдзя з дня нараджэння Максіма Багдановіча” (1981).
Запрашаем на выстаўку!
Кошт – 10 капеек!
Музей працуе з 10.00 да 18.00, панядзелак – выхадны.