Пётр Уладзіміравіч Свентахоўскі (1939-2006) – беларускі жывапісец з непаўторным светабачаннем, які пакінуў у мастацтве значны след і багатую творчую спадчыну. Творы Свентахоўскага знаходзяцца ў калекцыях Нацыянальнага мастацкага музея і Музея сучаснага выяўленчага мастацтва, у фондах Беларускага саюза мастакоў і Музея Вялікай Айчыннай вайны.
Таленавіты вучань заслужанага дзеяча мастацтваў Пятра Даніэлі, выпускнік Беларускага тэатральна-мастацкага інстытута, Пётр Уладзіміравіч спрабаваў сябе ў жанры пейзажу і нацюрморта, аднак асобнае месца ў творчасці мастака, чые юнацкія гады прайшлі ў пагранічным Брэсце, займалі ваенная тэматыка і салдацкае жыццё.
Мастак спрабаваў сябе і ў жанры партрэта. У 1993 годзе Пётр Свентахоўскі стварыў серыю партрэтаў выдатных беларускіх дзеячаў для Музея Максіма Багдановіча. Наведвальнікі нашага музея могуць убачыць, якімі паўсталі перад аўтарам гуманіст і асветнік Мікола Гусоўскі, першая беларуская асветніца Ефрасіння Полацкая, беларускія пісьменнікі Францішак Багушэвіч, Цётка (Алаіза Пашкевіч), Якуб Колас, Уладзімр Караткевіч і інш.
